గూగుల్ ఇటీవల పలు విమర్శలు ఎదుర్కొంటుంది.ఆ మధ్య గూగుల్లో మన దేశంలో చెత్త భాష ఏంటని సెర్చ్ చేయగా, కన్నడ అని ప్రత్యక్షం అయింది. దీనిపై నటి ప్రణీతతో పాటు కన్నడీగులు మండిపడ్డారు. తాజాగా ప్రముఖ కొరియోగ్రాఫర్ శేఖర్ మాస్టర్ విషయంలోను గూగుల్ చాలా పెద్ద తప్పు చేసింది. అందులోని సమాచారం చూసి ప్రతి ఒక్కరు షాక్ అయ్యారు.
గూగుల్లో శేఖర్ మాస్టర్ అని సెర్చ్ చేయగా, ఆయన పుట్టిన సంవత్సరం 1963 అని, చనిపోయిన రోజు జూలై 8,2003 అని వస్తోంది. ఇది చూసి ఆయన అభిమానులు అవాక్కయ్యారు. మంచిగా ఉన్న వ్యక్తిని గూగుల్ ఇలా చంపేసిందని ఫ్యాన్స్ ఆగ్రహం వ్యక్తం చేస్తున్నారు. అయితే తమిళనాడుకు చెందిన చైల్డ్ ఆర్టిస్ట్ జేవీ శేఖర్ని అందరూ మాస్టర్ శేఖర్ అనేవారు. దాదాపు 50 చిత్రాల్లో నటించిన ఆయన జూలై 8వ తేదీ 2003లో మరణించారు. ఆయన సమాచారాన్నిపొరపాటున కొరియోగ్రాఫర్ శేఖర్ మాస్టర్ ఫోటోతో అప్లోడ్ చేసింది గూగుల్. దీనిపై సర్వత్రా విమర్శలు వస్తున్నాయి.