హైదరాబాద్ : హీరో సుమంత్కు ఒకప్పుడు మంచి మార్కెట్ ఉండేది. కానీ ఇప్పుడు అది లేదు. ఆయన సినిమాలు చేస్తున్న సంగతి కూడా ప్రేక్షకులకు గుర్తులేదు. ఇప్పుడున్న ఈ పరిస్థితుల్లో సుమంత్ సినిమా ఫస్ట్ లుక్ విడుదలైన కూడా ఎవరూ పట్టించుకోరు. అలాంటిది ఇప్పుడు సుమంత్ సినిమా గురించి అన్ని మీడియా ఛానల్స్ కవర్ చేశాయి. సోషల్ మీడియాలో కూడా ఈయన సినిమా పేరు మార్మోగిపోతోంది. దానికి చిత్రయూనిట్ వేసిన మాస్టర్ ప్లాన్ ప్రధాన కారణం. హీరో సుమంత్ రెండో పెళ్లి చేసుకుంటున్నాడు అంటూ మూడు నాలుగు రోజులుగా సోషల్ మీడియాలో వార్తలు బాగా వచ్చాయి.
అయితే దీనిపై సుమంత్ స్పందించాడు. రెండో పెళ్లి చేసుకోవడం లేదు అని.. అలాంటి వార్తలన్నీ అబద్ధాలు అంటూ కొట్టిపారేశారు. తన కొత్త సినిమా పెళ్లి, విడాకులు కాన్సెప్టుతో తెరకెక్కుతోంది అని చెప్పాడు సుమంత్. ఇక్కడే అందరికీ ఒక అనుమానం వస్తుంది. నిజంగానే తన కొత్త సినిమా స్టిల్ వీళ్లే లీక్ చేసి సినిమాపై హైప్ క్రియేట్ చేశారేమో అనిపిస్తుంది. ఈ రోజుల్లో ఒక సినిమాను జనాల్లోకి తీసుకెళ్లడం అంటే చిన్న విషయం కాదు. అందులోనూ వరస ఫ్లాపుల్లో ఉన్న సుమంత్ లాంటి హీరో సినిమా గురించి ప్రేక్షకులు మాట్లాడుకోవాలంటే ఏదైనా ఒకటి స్పెషల్గా చేయాలి. ఆ స్పెషల్ సుమంత్ రెండో పెళ్లి టాపిక్.
సుమంత్ రెండో పెళ్లి చేసుకుంటున్నాడు అంటూ వార్తలు బయటకు వచ్చిన వెంటనే వైరల్ అయ్యాయి. ఇప్పుడు ఈ సినిమా ఫస్ట్ లుక్ విడుదల చేశారు. దాంతో ఇది కూడా బాగా వైరల్ అవుతుంది. కీర్తి కుమార్ అనే కొత్త దర్శకుడు మళ్ళీ మొదలైంది సినిమాను తెరకెక్కిస్తున్నాడు. పెళ్లి జీవితం, విడాకులు నేపథ్యంలో ఈ సినిమా తెరకెక్కుతోంది. నైనా గంగూలి సినిమాలో హీరోయిన్ గా నటిస్తుంది. ఇప్పటికే షూటింగ్ పూర్తి చేసుకున్న ఈ సినిమా పోస్ట్ ప్రొడక్షన్ తో బిజీగా ఉంది. త్వరలోనే విడుదల తేదీ ప్రకటించనున్నారు దర్శక నిర్మాతలు. మొత్తానికి ఒక ఐడియా జీవితాన్ని మార్చేసింది అన్నట్లు ఒక ప్లాన్ సినిమా ప్రమోషన్ కు బాగా ఉపయోగపడింది.