గురువారం 04 జూన్ 2020
Cinema - Apr 26, 2020 , 18:04:50

'ఘటోత్కచుడు' చిత్రానికి 25 వ‌సంతాలు

'ఘటోత్కచుడు' చిత్రానికి 25 వ‌సంతాలు

 'యమలీల' వంటి గోల్డెన్ జూబ్లీ హిట్ తర్వాత మనీషా ఫిలిమ్స్ బ్యానర్ లో కిషోర్ రాఠీ సమర్పణలో ఎస్ వి కృష్ణారెడ్డి దర్శ‌క‌త్వంలో అచ్చిరెడ్డి నిర్మించిన మరో సూపర్ హిట్ చిత్రం 'ఘటోత్కచుడు‌. ఏప్రిల్ 27 (సోమ‌వారం) తో 25 సంవత్సరాలు పూర్తి చేసుకోనుంది. 

ఈ సందర్భంగా నిర్మాత అచ్చిరెడ్డి మాట్లాడుతూ..మా మనీషా బ్యానర్ కి, కృష్ణారెడ్డికి, నాకు, మా యూనిట్ అందరికీ 'ఘటోత్కచుడు' 25 సంవత్సరాలు పూర్తి చేసుకోవడం ఒక గొప్ప అనుభూతిని కలిగిస్తోంది. ఘటోత్కచుడు గా కైకాల సత్యనారాయణ అద్భుత నటన ఈ చిత్రానికి ప్రాణం పోసింద‌న్నారు. 'యమలీల' తర్వాత అలీకి హీరోగా మంచి క్రేజ్ తెచ్చిన సినిమా ఇది. అలాగే టాప్ హీరోయిన్ రోజా పాత్ర అందరినీ అలరించింది. 

ఘ‌టోత్క‌చుడు చిత్రంలో రోబోట్ చేసిన చిత్ర విచిత్ర విన్యాసాలు చిన్న పిల్లలను అల‌రించాయి. 'ఘటోత్కచుడు' కి చిన్నపాపకు మ‌ధ్య వ‌చ్చే బావోద్వేగపూరిత స‌న్నివేశాలు ప్రేక్ష‌కుల క‌ళ్ల‌లో నీళ్లు తెప్పించాయి. అన్నింటికీ మించి కింగ్ నాగార్జున స్పెషల్ సాంగ్ సినిమా రేంజ్ ని పెంచింది. సినిమా ప్రారంభంలో వచ్చే కురుక్షేత్రం సన్నివేశాలు ఈ సినిమాకి పెద్ద మల్టిస్టారర్ లుక్ తీసుకొచ్చాయ‌న్నారు. 


కర్ణుడిగా యాంగ్రీ హీరో రాజశేఖర్, కృష్ణుడిగా చక్రపాణి, అర్జునుడిగా శ్రీకాంత్ నటించడం ప్రేక్షకులకు కన్నులపండువ‌లా అనిపించింది. ఎస్వీ కృష్ణారెడ్డి ఈ సినిమా కోసం చేసిన 'జ జ జ్జ రోజా...,' 'అందాల అపరంజి బొమ్మ..,' 'ప్రియమధురం..', 'భమ్ భమ్ భమ్..,' 'భామరో నన్నే ప్యార్ కారో...,' 'డింగు డింగు...' పాటలన్నీ ఎవర్ గ్రీన్ హిట్ సాంగ్స్ గా నిలిచాయి. ఈ చిత్రనిర్మాణం నా జీవితంలో ఒక మరపురాని ఘట్టం. 25 సంవత్సరాలు పూర్తి అయిన సందర్భంగా ఈ చిత్రాన్ని పెద్ద హిట్ చేసిన ప్రేక్షకులకు కృతజ్ఞతలు తెలుపుతున్న‌ట్లు చెప్పారు. 

ఈ 25 సంవ‌త్స‌రాలుగా టీవీలో వచ్చిన ప్రతిసారీ కొన్ని వందలమంది ఫోన్లు చేసి అభినందనలు తెలుపుతూ ఉండడం చాలా థ్రిల్ కలిగించిందని అచ్చిరెడ్డి అన్నారు. 'ఘటోత్కచుడు' లాంటి మంచి సినిమా మా మనీషా బ్యానర్ లో వచ్చినందుకు నాకు, కృష్ణారెడ్డికి ఎంతో సంతృప్తి గా ఉంటుంది. 'ఘటోత్కచుడు' కోసం అహర్నిశలు కృషి చేసిన టీంకి, ఈ ఘనవిజయానికి తోడ్పడిన ప్రేక్షకులకు, డిస్ట్రిబ్యూటర్స్ కు, ఎగ్జిబిటర్స్ కి, ప్ర‌త్యేకించి మీడియా మిత్రుల‌కు ప్ర‌త్యేకంగా ధ‌న్య‌వాదాలు తెలుపుతున్న‌ట్లు చెప్పారు.