మూవీ ఆర్టిస్ట్ అసోసియేషన్ అధ్యక్ష బరిలో మరో నటుడు నిలబడబోతున్నారు. సెప్టెంబర్లో జరగనున్న ‘మా’ ఎన్నికల్లో అధ్యక్షుడిగా పోటీచేయబోతున్నట్లు సీనియర్ నటుడు సీవీఎల్ నరసింహారావు ఆదివారం ప్రకటించారు. స్వతంత్య్ర అభ్యర్థిగా తాను పోటీచేయనున్నట్లు ఆయన తెలిపారు. సీవీఎల్ నరసింహారావు మాట్లాడుతూ రాబోయే ‘మా’ ఎన్నికల్లో ప్రెసిడెంట్గా నేను పోటీచేస్తున్నా. నా ప్యానల్ తెలంగాణవాదం. తెలంగాణ కళాకారులు, వారి ఇబ్బందులతో పాటు ఏపీకి చెందిన చిన్న, పేద, మధ్య తరగతి కళాకారులకు న్యాయం చేయాలన్నదే నా ఆలోచన. హీరోయిన్ తప్ప సినిమాలో ఇద్దరూ మాత్రమే పరభాషా నటులు ఉండాలని పదేళ్ల క్రితం ఏకగ్రీవంగా ‘మా’ నిర్ణయం తీసుకున్నది. ప్రస్తుతం ఆ విధానాన్ని పూర్తిగా తుంగలోకి తొక్కడంతో తెలంగాణతో పాటు తెలుగు కళాకారులకు అన్యాయం జరుగుతోంది. తెలుగు సినీ పరిశ్రమతో పాటు తెలంగాణ పరిశ్రమను బతికించుకోవాలనే నేను ఎన్నికల్లో నిలబడుతున్నా’ అని ఆయన తెలిపారు. ఇప్పటికే ‘మా’ అధ్యక్షపదవి కోసం మంచు విష్ణు, ప్రకాష్రాజ్, హేమ పోటీచేస్తున్నట్లు ప్రకటించారు. వీరితో పాటు జీవితా రాజశేఖర్ పేరు కూడా వినిపిస్తోంది.