‘నాకు భగత్సింగ్ పోరాటపటిమ అంటే ఇష్టం. ఈ దేశమే భగత్సింగ్ దేశం అయితే ఎంత బాగుంటుందో అనుకునేవాడిని. భగత్సింగ్ ఎక్కువరోజులు బ్రతికి ఉంటే చేగువేరా అంతటి మనిషయ్యేవారు’ అని అన్నారు అగ్ర నటుడు ప్రకాష్రాజ్. బుధవారం హైదరాబాద్లో ఆయన ‘భగత్సింగ్ నగర్’ చిత్ర టీజర్ను విడుదల చేశారు. విదార్థ్, ధృవిక నాయకానాయికలుగా వాలాజా క్రాంతి దర్శకత్వంలో గౌరి, రమేష్ ఈ చిత్రాన్ని నిర్మిస్తున్నారు. ప్రకాష్రాజ్ మాట్లాడుతూ ‘భగత్సింగ్ వంటి పోరాటయోధుల్ని మళ్లీ మనకు పరిచయం చేయాలనే గొప్ప ఆలోచనతో ఈ సినిమా చేయడం అభినందనీయం. ఇలాంటి దర్శకులకు మద్దతిస్తే సమాజం బాగుపడే చిత్రాలొస్తాయి. ఈ చిత్రాన్ని ప్రతి ఒక్కరు ప్రోత్సహించాలని కోరుతున్నా’ అన్నారు. ‘భగత్సింగ్ రాసిన చిన్న లైన్ను ఆదర్శంగా తీసుకొని ప్రస్తుతం సమాజంలో జరుగుతున్న యథార్థ ఘటనలతో ఈ సినిమా రూపొందించాను. భగత్సింగ్ నగర్లో జరిగే ఓ అందమైన ప్రేమకథ ఇది. వాస్తవికతను ప్రతిబింబిస్తూ ప్రతి ఒక్కరికి కనెక్ట్ అవుతుంది’ అని దర్శకుడు తెలిపారు. చక్కటి సందేశాత్మక చిత్రంలో భాగం కావడం ఆనందంగా ఉందని హీరోహీరోయిన్లు పేర్కొన్నారు. ఈ చిత్రానికి కెమెరా: రాజేష్ పీటర్, కళ్యాణ్ సమి, నేపథ్య సంగీతం: ప్రభాకర్, కథ, స్క్రీన్ప్లే, దర్శకత్వం: వాలాజా క్రాంతి.