న్యూఢిల్లీ: ట్యాక్స్ రీఫండ్ చేయిస్తామంటూ వచ్చే మోసగాళ్ల మెసేజీల వలలో పడొద్దని పన్ను చెల్లింపు దారులను ఆదాయం పన్నుశాఖ కోరింది. ఇటువంటి మెసేజ్లతో ఉండే ఎటువంటి లింక్లను క్లిక్ చేయొద్దని పన్ను చెల్లింపుదారులను ఐటీ శాఖ తన ట్విట్టర్ ఖాతా ద్వారా హెచ్చరించింది.
అటోబొట్ ఇన్ఫోసెక్ అనే సైబర్ సెక్యూరిటీ సంస్థతో కలిసి ఢిల్లీ కేంద్రంగా పని చేస్తున్న థింక్ ట్యాంక్ సైబర్ పీస్ ఫౌండేషన్ జరిపిన అధ్యయనం.. తనిఖీల్లో కొందరు మోసగాళ్లు.. స్టేట్ బ్యాంక్ ఆఫ్ ఇండియా, ఐసీఐసీఐ బ్యాంక్, హెచ్డీఎఫ్సీ, యాక్సిస్ బ్యాంక్, పంజాబ్ నేషనల్ బ్యాంక్ ఖాతాదారులను లక్ష్యంగా చేసుకుని ఫ్రాడ్కు ప్రయత్నిస్తున్నారని తేలింది.
ఇన్కం టాక్స్ ఈ-ఫైలింగ్ వెబ్ పేజీలా కనిపించే వెబ్ పేజీకి సంబంధించిన లింక్ను క్లిక్ చేస్తే ఆదాయం పన్ను రీఫండ్స్ పంపిణీ చేస్తామని, అందుకు ఒక అప్లికేషన్ తమకు పంపాలని పై ఐదు బ్యాంకుల ఖాతాదారులను సైబర్ మోసగాళ్లు టెక్ట్స్ మెసేజ్ ద్వారా కోరుతున్నారని సైబర్ ఫీస్ ఫౌండేషన్, ఆటోబోట్ ఇన్ఫోసెక్ నిర్ధారించాయి.
ఈ నకిలీ వెబ్ లింక్లు అమెరికా, ఫ్రాన్స్ దేశాల నుంచి వచ్చినట్లు అనుమానిస్తున్నాయి. ఈ సైబర్ మోసగాళ్లు సదరు లింక్లు ద్వారా పన్ను చెల్లింపుదారుల వ్యక్తిగత, బ్యాంకింగ్ డేటా సేకరిస్తాయి. అటుపై వారి బ్యాంకు ఖాతాల్లో జమ చేసిన మొత్తాలను తస్కరిస్తాయి.
గూగుల్ ప్లేస్టోర్ నుంచి కాక థర్డ్ పార్టీ సోర్స్ నుంచి అప్లికేషన్ డౌన్లోడ్ చేసుకోమని సదరు మోసగాళ్లు కోరారని వార్న్ చేసింది. ఈ లింక్ను ఓపెన్ చేసిన తర్వాత ఇన్కం టాక్స్ ఈ-ఫైలింగ్ వెబ్సైట్లోకి రీ డైరెక్ట్ చేస్తుంది. అటుపై ప్రొసీడ్ టూ ది వెరిఫికేషన్ స్టెప్స్ బటన్ అంటుంది.
అటుపై పూర్తి పేరు, పాన్ నంబర్, ఆధార్ నంబర్, చిరునామా, పిన్కోడ్, పుట్టిన తేది, మొబైల్ నంబర్, ఈ-మెయిల్ అడ్రస్, లింగం, వివాహ హోదా, బ్యాంక్ ఖాతాల సమాచారం.. ఖాతా నంబర్, ఐఎఫ్ఎస్సీ నంబర్, కార్డ్ నంబర్, ఎక్స్పైరీ డేట్, సీవీవీ/ సీవీసీ నంబర్, కార్డ్ పిన్ నంబర్ అడుగుతాయి. లాగిన్ డిటైల్స్తోపాటు మీరు పై సమాచారం అంతా ఇచ్చి ఉంటే భారీ ఆర్థిక నష్టాన్ని చవి చూడాల్సి వస్తుందని ఐటీ శాఖ హెచ్చరించింది.
మోసగాళ్లు ప్రత్యేకించి సీనియర్ సిటిజన్లు, గ్రుహిణులను లక్ష్యంగా చేసుకుని లింక్లు పంపుతున్నారు. సైబర్ ఫ్రాడ్స్టర్లు తాము లక్ష్యంగా నిర్దేశించుకున్న వారి ఈ-మెయిల్, టెలిఫోన్, టెక్స్ మెసేజ్ల ద్వారా సంప్రదించి ఐటీ అధికారులమని నమ్మించి మోసగించేందుకు ప్రయత్నిస్తారని ఐటీ శాఖ తెలిపింది. అటుపై వారి వ్యక్తిగత డేటా, బ్యాంకింగ్, క్రెడిట్ కార్డుల వివరాలు, పాస్వర్డ్లు తస్కరిస్తున్నారు.