Reliance-Aramco | రిలయన్స్ ఇండస్ట్రీస్, సౌదీ ఆరామ్కో మధ్య వాటాల విక్రయ ఒప్పందం చర్చలు మధ్యలోనే విఫలమయ్యాయి. రిలయన్స్ విలువ ఖరారుపైనే ఆందోళన వ్యక్తం కావడమే దీనికి కారణమని తెలుస్తోంది. ఇప్పటికే ప్రపంచ దేశాలు కర్బన ఉద్గారాలు వెలువరించే పెట్రోల్ వినియోగం నుంచి పక్కకు తప్పుకుంటున్న దశలో రిలయన్స్ ఆయిల్ టు కెమికల్స్ బిజినెస్ విలువ ఎంతన్న విషయం పైనే ఈ రెండు సంస్థల మధ్య ఒప్పంద చర్చలు నిలిచిపోయాయని సమాచారం. 2019 అంచనాతో పోలిస్తే రిలయన్స్ 15 బిలియన్ డాలర్లు తగ్గించుకోవాల్సి వస్తున్నది. ఈ నేపథ్యంలో ఆరామ్కోతో వాటాల విక్రయ ఒప్పందం మధ్యలోనే ఆగిపోవడంతో రిలయన్స్ తన వ్యూహం మార్చుకున్నట్లు తెలియ వచ్చింది. అధిక లాభాలు సంపాదించుకునేందుకు.. కెమికల్స్ తయారీలో స్పెషాలిటీ గల పలు సంస్థలతో ఒప్పందాలు కుదుర్చుకోవడంపై రిలయన్స్ ఇప్పుడు ఫోకస్ చేస్తోంది.
ప్రపంచంలోకెల్లా అతిపెద్ద ముడి చమురు ఎగుమతి దారైన ఆరామ్ కో.. రిలయన్స్లోని ఆయిల్ 2 కెమికల్స్ బిజినెస్లో 15 బిలియన్ డాలర్ల విలువ చేసే 20 శాతం వాటా కొనుగోలుకు 2019లో నాన్బైండింగ్ అగ్రిమెంట్పై సంతకాలు చేసింది. కానీ రెండేండ్ల చర్చల తర్వాత ఈ ఒప్పందం డీల్ను తిరిగి లెక్క గడతామని గతవారం రెండు సంస్థలు ప్రకటించాయి.
భూతాపం నివారణ వైపు గ్లోబల్ ఎనర్జీ ఇండస్ట్రీ దిశ మార్చుకుంటున్న తరుణమిది.. అంటే శిలాజ ఇంధనాలైన పెట్రోల్ నుంచి హరిత అనుకూల సంప్రదాయతేతర (renewable) ఇంధన వనరుల దిశగా ప్రపంచ ఇంధన పరిశ్రమ అడుగులేస్తున్నది. ఇటీవల గ్లాస్కోలో జరిగిన కాప్ 26 సదస్సులో పెట్రోల్ వాడకం తగ్గింపుపై సభ్య దేశాలు చర్చలు జరిపిన తర్వాత పెట్రోల్ రిఫైనింగ్ అండ్ పెట్రో కెమికల్ సంస్థల ఆస్తుల విలువ పడిపోయింది.
2019లో రిలయన్స్ ఆయిల్ 2 కెమికల్ బిజినెస్ విలువ 75 బిలియన్ల డాలర్లు అని ఆ సంస్థ సీనియర్ అధికారుల కథనం. తాజాగా మారిన పరిస్థితుల్లో రిలయన్స్ ఆయిల్ 2 కెమికల్ బిజినెస్ విలువను కన్సల్టెంట్స్ గణనీయంగా అంటే 10శాతానికి పైగా తగ్గించేశారని ఆ అధికారులు చెబుతున్నారు. రిలయన్స్ తన సంస్థ విలువపై గోల్డ్మన్సాచెస్ను, ఆరామ్ కో ప్రతినిధులు సిటీ గ్రూప్ బ్యాంకు సాయం కోరారు. కానీ దీనిపై రెండు బ్యాంకులు స్పందించేందుకు నిరాకరించాయి.
రిలయన్స్ ఎనర్జీ బిజినెస్ విలువను 80 బిలియన్ డాలర్ల నుంచి 70 బిలియన్ డాలర్లకు తగ్గించాలని జెఫరీస్ ప్రతిపాదించింది. మరోవైపు కొటక్ ఇన్స్ట్యూషనల్ ఈక్విటీస్ 61 బిలియన్ డాలర్లకు కుదించింది. బెర్న్స్టైన్ మాత్రం 69 బిలియన్ డాలర్లుగా అంచనా వేసింది.