విలీనం వాయిదా

న్యూఢిల్లీ, జనవరి 25: ప్రభుత్వ రంగ టెలికం సంస్థలు బీఎస్‌ఎన్‌ఎల్‌, ఎంటీఎన్‌ఎల్‌ విలీనాన్ని రక్షణ మంత్రి రాజ్‌నాథ్‌ సింగ్‌ నేతృత్వంలోని మంత్రుల బృందం వాయిదా వేసింది. ఎంటీఎన్‌ఎల్‌ అధిక రుణ భారమే ఇందుకు కారణమని తెలుస్తున్నది. ఉద్యోగుల వేతన వివాదాలూ ఉన్నట్లు సమాచారం. పీకల్లోతు నష్టాల్లో కూరుకుపోయిన బీఎస్‌ఎన్‌ఎల్‌-ఎంటీఎన్‌ఎల్‌లను ఆదుకోవడంలో భాగంగా రూ.69,000 కోట్ల పునరుద్ధరణ ప్యాకేజీకి కేంద్ర క్యాబినెట్‌ ఇప్పటికే ఆమోదం తెలిపిన విషయం తెలిసిందే. ఈ ప్యాకేజీలో ఇరు సంస్థల విలీన ప్రతిపాదన, ఆస్తుల నగదీకరణ నిర్ణయాలు కూడా ఉన్నాయి. ఇదిలావుంటే నొయిడాలోని 6వేల చదరపు మీటర్ల బీఎస్‌ఎన్‌ఎల్‌ స్థలాన్ని సెంట్రల్‌ బోర్డ్‌ ఆఫ్‌ సెకండరీ ఎడ్యుకేషన్‌కు అమ్మేందుకు మంత్రుల బృందం అంగీకరించింది.