శుక్రవారం 05 జూన్ 2020
Business - May 13, 2020 , 00:38:48

భారత్‌కు లాభిస్తుందని చెప్పలేం

భారత్‌కు లాభిస్తుందని చెప్పలేం

చైనా నుంచి విదేశీ కంపెనీల నిష్క్రమణపై అభిజిత్‌ బెనర్జీ

కోల్‌కతా: కరోనా వైరస్‌ వ్యాప్తి నేపథ్యంలో చైనా నుంచి విదేశీ కంపెనీలు నిష్క్రమించినప్పటికీ దానివల్ల భారత్‌కు లాభిస్తుందని కచ్చింగా చెప్పలేమని నోబెల్‌ గ్రహీత అభిజిత్‌ బెనర్జీ అన్నారు. కొవిడ్‌-19 సంక్షోభాన్ని అధిగమించేందుకు ఉపకరించే రోడ్‌మ్యాప్‌ను రూపొందించేందుకు పశ్చిమ బెంగాల్‌ ఏర్పాటుచేసిన గ్లోబల్‌ అడ్వైజరీ బోర్డులో సభ్యునిగా వ్యవహరిస్తున్న అభిజిత్‌ బెనర్జీ సోమవారం ఓ న్యూస్‌ ఛానల్‌కు ఇచ్చిన ఇంటర్వ్యూలో ఈ వ్యాఖ్య చేశారు. ‘కరోనా వైరస్‌ వ్యాప్తికి చైనాయే కారణమని చాలామంది నిందిస్తున్నారు. చైనా నుంచి విదేశీ కంపెనీలు నిష్క్రమిస్తే భారత్‌ లాభపడుతుందని కొందరు అంచనా వేస్తున్నారు. కానీ అలా జరుగకపోవచ్చు. చైనా తన కరెన్సీ విలువను తగ్గించుకొంటే ఆ దేశ ఉత్పత్తులు మరింత చౌకగా లభిస్తాయి. దీంతో ప్రజలు వాటి కొనుగోళ్లను కొనసాగిస్తారు’ అని బెనర్జీ పేర్కొన్నారు. కరోనా కాటుతో కుదేలైన దేశ ఆర్థిక వ్యవస్థకు ఊతమిచ్చేందుకు కేంద్ర ప్రభుత్వం ప్రకటించిన ఉద్దీపనల ప్యాకేజీపై ఆయన అసంతృప్తి వ్యక్తం చేశారు. ‘మన దేశ ఆర్థిక వ్యవస్థను చక్కదిద్దేందుకు జీడీపీలో ఒక్క శాతం కంటే తక్కువ మొత్తాన్ని ఖర్చుచేయనున్నట్టు మోదీ సర్కార్‌ ప్రకటించింది. ఇది ఏమాత్రం చాలదు. దీన్ని మరింత పెంచాల్సిన అవసరమున్నది’ అని బెనర్జీ స్పష్టం చేశారు. దేశాలు తమ ఆర్థిక వ్యవస్థలను చక్కదిద్దుకొనేందుకు స్థూల దేశీయోత్పత్తి (జీడీపీ)లో అధిక మొత్తాన్ని ఖర్చుచేస్తున్న విషయాన్ని ఆయన గుర్తుచేశారు. 


logo