శుక్రవారం 22 జనవరి 2021
Business - Jan 14, 2021 , 03:01:29

హెల్త్‌ ప్రొవైడర్లతో ఒప్పందాలు

హెల్త్‌ ప్రొవైడర్లతో ఒప్పందాలు

  • కొవిడ్‌-19 చికిత్స రేట్లపై బీమా సంస్థలకు ఐఆర్‌డీఏఐ సూచన 
  • పాలసీలపై పరిశీలనకు నిపుణుల కమిటీ

న్యూఢిల్లీ, జనవరి 13: వివిధ రకాల వ్యాధుల చికిత్సకు సంబంధించిన రేట్లపై హెల్త్‌ ప్రొవైడర్లతో ఒప్పందాలను కుదుర్చుకున్నట్లుగానే కొవిడ్‌-19 చికిత్సకు సంబంధించిన రేట్లపై కూడా వారితో ఒప్పందాలను కుదుర్చుకోవాలని సాధారణ, ఆరోగ్య బీమా సంస్థలకు ఇన్సూరెన్స్‌ రెగ్యులేటరీ అథారిటీ ఆఫ్‌ ఇండియా (ఐఆర్‌డీఏఐ) సూచించింది. ఈ మేరకు బుధవారం ఓ సర్క్యులర్‌ను జారీ చేసింది. ఆరోగ్య బీమా పాలసీ కింద పాలసీదారులు ‘నగదు రహిత క్లెయిమ్‌లు’ చేసుకున్నట్లయితే.. సంబంధిత చట్టంలోని నియమ నిబంధనల ప్రకారం ఉభయ పక్షాలు నిర్ణయించిన ధరలకు అనుగుణంగా ఆ క్లెయిమ్‌లను సెటిల్‌ చేయాలని ఆ సర్క్యులర్‌లో ఐఆర్‌డీఏఐ స్పష్టం చేసింది. అంతేకాకుండా ప్రస్తుత సమాజ అవసరాలకు అనుగుణమైన ఆరోగ్య బీమా పాలసీలు దేశంలో అందుబాటులో ఉన్నాయో లేదో పరిశీలించడంతోపాటు సమాజానికి తగిన బీమా పాలసీలను సిఫారసు చేసేందుకు నిపుణులతో కూడిన కమిటీని ఏర్పాటు చేసింది. దేశంలో గత కొన్నేండ్ల నుంచి ఆరోగ్య బీమా రంగం గణనీయంగా వృద్ధి చెందింది. కొవిడ్‌-19 సంక్షోభం వల్ల తలెత్తిన సమస్యలతో ఈ పాలసీలను తీసుకునేవారి సంఖ్య ఇటీవలి కాలంలో మరింత పెరిగింది. ఈ నేపథ్యంలో వివిధ బీమా సంస్థలు ఆఫర్‌ చేస్తున్న ఆరోగ్య పాలసీలు, సేవలు సమాజ అవసరాలకు తగినట్లుగా ఉన్నయో లేదో పరిశీలించేందుకు నిపుణుల కమిటీని ఏర్పాటు చేసినట్లు ఐఆర్‌డీఏఐ వెల్లడించింది. 



logo