వెల్లింగ్టన్: వరల్డ్ టెస్ట్ చాంపియన్షిన్ గెలిచిన న్యూజిలాండ్ టీమ్ పేస్ బౌలర్ టిమ్ సౌథీ.. ఫైనల్లో తాను వేసుకున్న జెర్సీల్లో ఒకదానిని వేలం వేస్తున్నాడు. ఆ వచ్చిన డబ్బును అతడు క్యాన్సర్తో బాధపడుతున్న 8 ఏళ్ల చిన్నారికి ఇవ్వనున్నాడు. ఫైనల్ సెకండ్ ఇన్నింగ్స్లో 4 వికెట్లు తీసి టీమ్ విజయంలో కీలకపాత్ర పోషించాడు సౌథీ. ఈ చారిత్రక టెస్ట్ మ్యాచ్లో తాను వేసుకున్న షర్ట్ను వేలం వేస్తున్నట్లు సౌథీ ఆ వేలం వెబ్సైట్లో చెప్పాడు. న్యూరోబ్లాస్టోమా అనే అరుదైన క్యాన్సర్తో ఆ చిన్నారి బాధపడుతోంది. కొన్నాళ్లుగా హోలీ బీటీ అనే ఆ అమ్మాయికి సౌథీ తనకు తోచిన సాయం చేస్తూనే ఉన్నాడు.
ఇప్పుడు తన టీమ్ సభ్యులందరూ సంతకాలు చేసిన తన జెర్సీని వేలం వేస్తున్నాడు. కొద్దో, గొప్పో ఎంత వీలైతే అంత సాయం చేయాలని సౌథీ కోరుతున్నాడు. ఈ వేలం ద్వారా వచ్చిన డబ్బు మొత్తం ప్రస్తుతం స్పెయిన్లో చికిత్స పొందుతున్న బీటీకి వెళ్తాయని అతడు చెప్పాడు. రెండేళ్ల కిందట ఆ చిన్నారి గురించి తనకు తెలిసిందని, అప్పటి నుంచి తనకు తోచిన రీతిలో సాయం చేస్తూనే ఉన్నానని తెలిపాడు. ఈ జెర్సీ వేలం ద్వారా వచ్చిన డబ్బు ఆమెకు ఎంతో కొంత సాయం చేస్తుందన్న నమ్మకం తనకున్నదని అన్నాడు. ఈ వేలానికి జులై 8 వరకూ బిడ్లు దాఖలు చేయవచ్చు. మంగళవారం ఉదయం వరకూ 152 బిడ్లు దాఖలు కాగా.. అత్యధికంగా 7 వేల డాలర్ల బిడ్ వచ్చింది.