తిరుచిరాపల్లి: ప్రస్తుతం జరుగుతున్న అసెంబ్లీ ఎన్నికల్లో డీఎంకే పార్టీని అటు ఏఐఏడీఎంకే, ఇటు కమల్హాసన్ పార్టీ టార్గెట్ చేసుకున్నాయి. తమ హామీలను డీఎంకే కాపీ కొడ్తుందని ఇప్పటికే ఏఐఏడీఎంకే ఆరోపించగా.. తాజాగా కమల్హాసన్ కూడా ఆరోపణలు చేశారు. తాను మహిళలకు ఇవ్వాలనుకున్న ఆర్థిక ఆసరా పథకాన్ని డీఎంకే కాపీ కొట్టి తమ కన్నా ముందే ప్రజలకు చెప్తోందని కమల్హాసన్ ఆరోపించారు.
ఏప్రిల్ 6 న జరగనున్న 2021 అసెంబ్లీ ఎన్నికల్లో పార్టీ విజయం సాధిస్తే తమిళనాడులోని మహిళా కుటుంబ పెద్దలందరికీ నెలకు రూ.1,000 ఆర్థిక సహాయం అందిస్తామని ద్రవిడ మున్నేట్ర ఖజగం (డీఎంకే) ఆదివారం ఎన్నికల ప్రచారంలో భాగంగా ప్రజలకు హామీ ఇచ్చింది. తమిళనాడు తిరుచిరాపల్లిలో నిర్వహించిన ర్యాలీలో డీఎంకే చీఫ్ ఎంకె స్టాలిన్ ఈ మేరకు హామీ ఇస్తూ అధికారంలోకి రాగానే తొలి ప్రాధాన్యతగా అమలుచేస్తామన్నారు. ప్రజా పంపిణీ కేంద్రాల నుంచి అవసరమైన వస్తువులను అందుకుంటున్న అన్ని కుటుంబాలకు ఈ నగదు సహాయం ఉపయోగపడుతుందని చెప్పారు. ఈ సందర్భంగా తమిళనాడు అభివృద్ధి కోసం పదేండ్ల ప్రగతిపత్రాన్ని ఆయన విడుదల చేశారు. కుటుంబపెద్దలుగా ఉండే మహిళలకు ఆర్థికంగా ఆదుకునేందుకు నెలకు రూ.1,000 అందజేస్తామని స్టాలిన్ పేర్కొన్నారు.
అయితే, ఈ హామీని తాము మూడు నెలల క్రితమే సిద్ధం చేసుకున్నామని, మహిళలకు ఆర్థిక ఆసరా అందించేందుకు నెలకు రూ.వేయి ఇవ్వనున్నట్లు చేసిన హామీని మక్కల్ నీది మయ్యమ్ పార్టీ అధినేత కమల్హాసన్ గుర్తుచేశారు. అతను మా ఆలోచనలను కాపీ కొట్టి తమవిగా ప్రజల్లో ప్రచారం చేసుకుంటున్నారని ఆరోపించారు. గృహనిర్వాహకులకు జీతం చెల్లిస్తామని నేను చెప్పినప్పుడు, అతను వారికి నెలకు రూ.1,000 ఇస్తానని చెప్పారు. ఇలాంటి వాగ్దానం చేసిన మొదటి రాజకీయ పార్టీ మాదే అని కమల్హాసన్ చెప్పారు.
ఐదేండ్లలో 50 లక్షల ఉద్యోగాలు కల్పిస్తామని ఎంఎన్ఎం ప్రతిజ్ఞ చేసిందని ఆయన తెలిపారు. దీన్ని కూడా కాపీకొట్టిన డీఎంకే.. సంవత్సరానికి 10 లక్షల ఉద్యోగాలను సృష్టిస్తామని చెప్తున్నారని ఎద్దేవా చేశారు.
తమిళనాడులో డిఎంకె అధికారంలోకి వస్తే ప్రతి రేషన్కార్డు హోల్డర్ గృహిణికి నెలకు రూ.1,000 తో పాటు అందరికీ తాగునీరు అందించేందుకు కృషిచేస్తామని స్టాలిన్ తన హామీపత్రంలో పేర్కొన్నారు. సముద్రంలో తరలిపోతున్న నీటి వ్యర్థాలను 50 శాతం నుండి 15 శాతానికి తగ్గించడానికి పాటుపడతామని, వ్యవసాయాన్ని తీర్చిదిద్దుతామని, రానున్న పదేండ్లలో డబుల్ డిజిల్ ఆర్థిక వృద్ధి సాధించేందుకు కృషిచేస్తామని స్టాలిన్ పార్టీ తన మ్యానిఫెస్టోలో తెలిపింది.