Homeloan without ITR | సొంతింటి కల సాకారం చేసుకోవాలని ప్రతి భారతీయుడి కల.. ప్రస్తుతం తక్కువ వడ్డీరేటుపై బ్యాంకులు ఆకర్షణీయ హోంలోన్లు ఇస్తున్నాయి. కానీ ఆ రుణాలకు దరఖాస్తు చేయాలంటే ఆదాయం పన్ను రిటర్న్స్ (ఐటీఆర్) దాఖలు చేయాలి. ఐటీఆర్ ఫామ్స్ ఉంటే.. వారి ఆదాయాన్ని బట్టి బ్యాంకులు రుణాలిస్తాయి.. కానీ ఐటీఆర్ దాఖలు చేయలేని కార్మికులకు, స్వయం ఉపాధిపై జీవిస్తున్న వారు సొంతింటిని కొనుగోలు చేసే వెసులుబాటు అందుబాటులోకి వచ్చింది. 75వ స్వాతంత్ర్య దినోత్సవం సందర్భంగా ఐసీఐసీఐ హోం ఫైనాన్స్ ఆ ఫెసిలిటీ కల్పిస్తోంది.
తమ ఆదాయ వివరాలు వెల్లడించే ఐటీఆర్ పత్రాలు సమర్పించలేని వారికి ఈ ఫెసిలిటీ కల్పిస్తున్నట్లు ఐసీఐసీఐ హోం ఫైనాన్స్ తెలిపింది. ‘బిగ్ ఫ్రీడం మంత్’ అనే పేరుతో ‘స్పాట్ సరళ్ హౌసింగ్ లోన్’ కింద ఈ రుణ సదుపాయం కలిగిస్తోంది.
కార్పెంటర్లు, ఎలక్ట్రీషియన్లు, టైలర్లు, ప్లంబర్లు, పెయింటర్లు, ఆటోమెకానిక్స్లు, ఆటో డ్రైవర్లు, టాక్సీ డ్రైవర్లు తదితరులకు బిగ్ ఫ్రీడం మంత్ పేరుతో ఇంటి రుణాలిస్తున్నది ఐసీఐసీఐ హోం ఫైనాన్స్. అయితే హోం లోన్ కావాలని కోరే వారు పాన్ కార్డ్, ఆధార్ కార్డ్, ఆరు నెలల బ్యాంక్ ఖాతా స్టేట్మెంట్ సమర్పించాల్సి ఉంటుంది.
బిగ్ ఫ్రీడం మంత్లో భాగంగా వివిధ రకాల హౌసింగ్ లోన్ ఆఫర్ల కింద ఆన్సైట్ హోం లోన్ అందుబాటులోకి తెస్తున్నట్లు ఐసీఐసీఐ హోం ఫైనాన్స్ ఎండీ కం సీఈవో అనిరుద్ధ్ కమానీ చెప్పారు. కనీస పత్రాలు సమర్పించిన వారికి రుణ పరపతి కల్పించడంలో తమ ఐసీఐసీఐ శాఖల్లోని స్థానిక ప్రతినిధులు చేయూతనిస్తారన్నారు.
స్పాట్ సరళ్ హౌసింగ్ లోన్ కింద ఇంటి రుణం తీసుకున్న రుణ గ్రహీతలు రుణంపై రూ.2.67 లక్షల వరకు వడ్డీ మీద ప్రధానమంత్రి ఆవాజ్ యోజన (పీఎంఏవై) కింద సబ్సిడీ అందుకోవచ్చు. ఆర్థికంగా వెనుకబడి వర్గాల వారికి, తక్కువ ఆదాయ వర్గాల వారికి స్పాట్ సరళ్ హౌసింగ్ లోన్ ఫెసిలిటీ అందుబాటులోకి తెచ్చినట్లు ఐసీఐసీఐ హోం పైనాన్స్ వెల్లడించింది.