గురువారం 21 జనవరి 2021
Business - Dec 03, 2020 , 00:29:48

పేటీఎంకు యాంట్‌ గుడ్‌బై?

పేటీఎంకు యాంట్‌ గుడ్‌బై?

  • సంస్థలో తమ వాటా అమ్మకానికి యోచన
  • భారత్‌-చైనా ఉద్రిక్తతలే కారణం

న్యూఢిల్లీ: భారత్‌-చైనా ఉద్రిక్తతల సెగ.. పేటీఎంకు తాకుతున్నట్లు కనిపిస్తున్నది. డ్రాగన్‌ ఫైనాన్షియల్‌ టెక్నాలజీ దిగ్గజం యాంట్‌ గ్రూప్‌.. పేటీఎంలోని తమ వాటాలను ఉపసంహరించుకునే యోచనలో ఉన్నట్లు తెలుస్తున్నది మరి. పేటీఎంలో అలీబాబా గ్రూప్‌నకు చెందిన యాంట్‌కు 30 శాతం వాటా ఉన్నది. ప్రస్తుతం దీని విలువ దాదాపు 4.8 బిలియన్‌ డాలర్లు (రూ.35,400 కోట్లు)గా ఉంటుందని అంచనా. అయితే గల్వాన్‌లో 20 మంది భారత సైనికులను చైనా పొట్టనబెట్టుకోవడంతో ఇరు దేశాల మధ్య వాతావరణం ఒక్కసారిగా వేడెక్కింది. ముఖ్యంగా వాణిజ్య సంబంధాలపై ఆ ప్రభావం పడుతున్నది. ఈ క్రమంలోనే పేటీఎంలోని వాటాను యాంట్‌ గ్రూప్‌ అమ్మేయనుందన్న వార్తలు వస్తున్నాయి.

అలాంటిదేమీ లేదు

మరోవైపు ఈ ఊహాగానాల్లో నిజం లేదని అటు యాంట్‌ గ్రూప్‌.. ఇటు పేటీఎం వర్గాలు కొట్టిపారేస్తున్నాయి. ఈ విషయమై ఇరు సంస్థల మధ్య ఎలాంటి చర్చలు ఇప్పటిదాకా జరుగనే లేదని స్పష్టం చేశాయి. కాగా, పేటీఎంలో సాఫ్ట్‌బ్యాంక్‌ గ్రూప్‌ తదితర ఇతర విదేశీ సంస్థల వాటాలూ ఉండగా, సంస్థ మొత్తం విలువను దాదాపు 16 బిలియన్‌ డాలర్లుగా అంచనా వేస్తున్నారు.



logo