సోమవారం 08 మార్చి 2021
Business - Dec 09, 2020 , 01:30:06

పసిడికి రెక్కలు

పసిడికి రెక్కలు

  • తులంపై రూ.810 పెరుగుదల
  • రూ.3 వేలకుపైగా ఎగబాకిన వెండి

న్యూఢిల్లీ: బంగారం ధరలకు మళ్లీ రెక్కలొచ్చాయి. ప్రపంచవ్యాప్తంగా మరోమారు కరోనా కేసులు పెరుగుతున్న నేపథ్యంలో ఆర్థిక వ్యవస్థపై అమెరికా ఫెడరల్‌ రిజర్వు ఆందోళన వ్యక్తం చేయడంతో పెట్టుబడిదారులు తమ ఇన్వెస్ట్‌మెంట్లను సురక్షితమైన అతి విలువైన లోహాలవైపు మళ్లిస్తున్నారు. దీంతో         పుత్తడి ధరలు భారీగా పెరిగాయి. దేశ రాజధాని న్యూఢిల్లీలో 99.9 శాతం స్వచ్ఛత కలిగిన పది గ్రాముల బంగారం ధర మంగళవారం రూ.810 పెరిగి రూ.49,430 పలికింది. అంతకుముందు ఈ ధర రూ.48,610గా ఉన్నది. పసిడితోపాటు వెండి కూడా రూ.3 వేలకుపైగా పెరిగి కొనుగోలుదారులకు జంకుపుట్టించింది. పారిశ్రామిక వర్గాలు, నాణేల తయారీదారుల నుంచి లభించిన కొనుగోళ్ళ మద్దతుతో మంగళవారం కిలో వెండి ఏకంగా రూ.3,060 ఎగబాకి రూ.64,360కి చేరుకున్నది. అంతర్జాతీయ ధరలకు తోడు దేశీయంగా పెళ్ళిళ్ళ సీజన్‌ కూడా తోడవడం ధరల పెరుగుదలకు ప్రధాన కారణమని బులియన్‌ వర్గాలు వెల్లడించాయి. హైదరాబాద్‌ బులియన్‌ మార్కెట్లో 24 క్యారెట్ల గోల్డ్‌ ధర రూ.760 ఎగబాకి రూ.50,070 పలికింది. గత పది రోజుల్లో ఇంచుమించు రూ.2 వేల వరకు అధికమైంది. అలాగే కిలో వెండి ధర రూ.2,500 పెరిగింది. అంతర్జాతీయ మార్కెట్లో ఔన్స్‌ గోల్డ్‌ ధర 1,864 డాలర్లు పలుకగా, వెండి 24.52 డాలర్ల వద్ద స్థిరంగా ఉన్నది. 

VIDEOS

logo