సోమవారం 30 మార్చి 2020
Business - Feb 11, 2020 , 00:03:21

‘ఆటో’కు కరోనా భయాలు

‘ఆటో’కు కరోనా భయాలు
  • చైనా విడిభాగాల దిగుమతులపై ఆందోళన
  • వైరస్‌ నేపథ్యంలో సరఫరా ప్రభావితం కావచ్చంటున్న సియామ్‌

గ్రేటర్‌ నోయిడా, ఫిబ్రవరి 10:కరోనా వైరస్‌పై దేశీయ ఆటో పరిశ్రమ ఆందోళన వ్యక్తం చేస్తున్నది. రోజురోజుకూ విస్తరిస్తున్న ఈ ప్రాణాంతక మహమ్మారి.. చైనా నుంచి భారత్‌కు వచ్చే ఆటో విడిభాగాల దిగుమతులను ప్రభావితం చేస్తుందేమోనన్న భయాన్ని భారతీయ ఆటోమొబైల్‌ తయారీదారుల సంఘం (సియామ్‌) వ్యక్తం చేస్తున్నది. కరోనా తీవ్రతకు చైనా వణికిపోతున్న విషయం తెలిసిందే. ఈ వైరస్‌ ధాటికి వందలాది మంది చనిపోగా, వేలాది మంది మృత్యువుతో పోరాడుతున్నారు. ఈ క్రమంలో ఇప్పుడు చైనా.. కరోనా అదుపుపైనే దృష్టిపెట్టగా, ఉత్పత్తి ఒక్కసారిగా పడిపోయింది. కరోనా వ్యాప్తిని అడ్డుకోవడంలో భాగంగా చైనాలోని పారిశ్రామిక సంస్థలు తయారీ కేంద్రాలను మూసేస్తున్నాయి. ఐటీ తదితర సంస్థలు ఉద్యోగులచే ఇంటి నుంచే పని చేయిస్తుండగా, ఉత్పాదక సంస్థలు మాత్రం సెలవులను ప్రకటిస్తున్నాయి. ఇప్పటికే అక్కడి ఆటో సంస్థలు ప్లాంట్లను మూసివేసిన సంగతీ విదితమే. ఆటో విడిభాగాల తయారీ సంస్థల సంగతీ ఇంతే. దీంతో తమ సభ్యుల నుంచి ప్రస్తుత స్థితిగతుల వివరాలను సేకరిస్తున్నట్లు సియామ్‌ డైరెక్టర్‌ జనరల్‌ రాజేశ్‌ మీనన్‌ సోమవారం ఇక్కడ విలేకరులకు తెలిపారు.


బీఎస్‌-6కు దెబ్బ

బీఎస్‌-4 నుంచి బీఎస్‌-6కు మారుతున్న భారతీయ వాహన రంగాన్ని కరోనా వైరస్‌ దెబ్బతీస్తున్నది. ఈ ఏడాది ఏప్రిల్‌ 1 నుంచి బీఎస్‌-6 వాహన అమ్మకాలు మాత్రమే దేశీయ మార్కెట్‌లో జరుగాలని కేంద్రంలోని నరేంద్ర మోదీ సర్కారు నిర్ణయం తీసుకున్నది తెలిసిందే. వాతావరణ కాలుష్యాన్ని అరికట్టడంలో భాగంగా బీఎస్‌-4 నుంచి బీఎస్‌-6కు ఆటో పరిశ్రమ పరివర్తనం చెందుతున్నది. ఇందుకు కావాల్సిన విడిభాగాలు చైనా నుంచే పెద్ద మొత్తంలో భారత్‌కు వస్తున్నాయి. దీంతో వైరస్‌ కారణంగా మూతబడే అక్కడి పరిశ్రమ.. ఇక్కడి విడిభాగాల అవసరాల కొరతకు దారితీస్తుందన్న అనుమానాలు ఇప్పుడు ఆటో ఇండస్ట్రీని వెంటాడుతున్నాయి.


గడువు పొడిగిస్తారా?..

చైనాలో కరోనా వైరస్‌ వ్యాప్తి, అక్కడి ఉత్పాదక రంగంపై దాని ప్రభావం మధ్య ఏప్రిల్‌ 1 నుంచి బీఎస్‌-6 వాహన అమ్మకాల నిబంధన గడువును పొడిగిస్తారా? అన్నదానికి ఇప్పుడే చెప్పలేమని సియామ్‌ అంటున్నది. మరో రెండు, మూడు రోజుల్లో దీనిపై స్పష్టత వస్తుందని మీనన్‌ తెలిపారు. ప్రస్తుతం దీనిపై ఏమీ చెప్పలేమని, వైరస్‌ ప్రభావం చైనా విడిభాగాల సరఫరాపై ఏ స్థాయిలో ఉంటుందో అంచనా వేయలేమని మారుతీ సుజుకీ ఎండీ, సీఈవో కెనిచి అయుకవా పీటీఐతో అన్నారు.


మళ్లీ తగ్గిన అమ్మకాలు

దేశీయ మార్కెట్‌లో ప్యాసింజర్‌ వాహన విక్రయాలు మళ్లీ తగ్గుముఖం పట్టాయి. గత నెలలో 6.2 శాతం క్షీణించాయి. జీడీపీ మందగమనం, పెరిగిన ధరలు కొనుగోళ్ల సెంటిమెంట్‌ను దెబ్బతీశాయి. సియామ్‌ తెలిపిన తాజా వివరాల ప్రకారం జనవరిలో 2,62,714 యూనిట్ల అమ్మకాలు జరిగాయి. గతేడాది జనవరిలో ఇవి 2,80,091 యూనిట్లుగా ఉన్నాయి. కార్ల విక్రయాలు 8.1 శాతం తగ్గి గతంతో పోల్చితే 1,79,324 యూనిట్ల నుంచి 1,64,793 యూనిట్లకు పడిపోయాయి. ‘బీఎస్‌-4 నుంచి బీఎస్‌-6కు వాహనాలను ఆధునికీకరిస్తుండటంతో ధరలు పెరుగుతున్నాయి. ఇది కొనుగోళ్లను దెబ్బతీస్తున్నది’ అని సియామ్‌ అధ్యక్షుడు రాజన్‌ వధేరా అన్నారు. ద్విచక్ర వాహన విక్రయాలూ జనవరిలో 16.06 శాతం క్షీణించాయన్నారు.


logo