బ్యాలెన్స్‌ లేక ఏటీఎం ట్రాన్సాక్షన్‌ ఫెయిలయితే చార్జీలు

న్యూఢిల్లీ: బ్యాంకు ఖాతాలో తగినంత డబ్బులు లేకపోయినా ఏటీఎం ద్వారా తీసుకునేందుకు ప్రయత్నిస్తే చార్జీలు తప్పవు. బ్యాలెన్స్‌ లేక ఏటీఎం ట్రాన్సాక్షన్‌ ఫెయిలయిన సందర్భాల్లో దేశంలోని పలు బ్యాంకులు పలు రకాలుగా చార్జీలు వసూలు చేస్తున్నాయి. స్టేట్‌ బ్యాంక్‌ ఆఫ్‌ ఇండియా (ఎస్‌బీఐ) తన వినియోగదారుల నుంచి రూ.20తోపాటు జీఎస్టీ వసూలు చేస్తున్నది. ఐసీఐసీఐ, హెచ్‌డీఎఫ్‌సీ రూ.25తోపాటు జీఎస్టీని అపరాద రుసుముగా వసూలు చేస్తున్నాయి. యాక్సిస్‌, కొటక్‌ మహేంద్ర బ్యాంకులు రూ.25 వసూలు చేస్తున్నాయి. 

బ్యాంకు ఖాతాలో బ్యాలెన్స్‌ లేక ఏటీఎం ట్రాన్సాక్షన్‌ ఫెయిలయిన సందర్భాల్లో సాధారణంగా జాతీయ బ్యాంకులు రూ.20తోపాటు జీఎస్టీ, ప్రైవేట్‌ బ్యాంకులు రూ.25తోపాటు కొన్ని సందర్భాల్లో పన్నులు కలిపి చార్జీలుగా వసూలు చేస్తున్నాయి. అయితే బ్యాంకు ఖాతాలో డబ్బులు లేకపోయినా ఏటీఎం ద్వారా డ్రా చేసేందుకు ప్రయత్నిస్తే సంబంధిత బ్యాంకులు చార్జీలు విధించడం అన్నది కొత్త నిబంధన కాదు. కాకపోతే బ్యాంకు వినియోగదారులుకు దీనిపై సరైన అవగాహన లేదు. 

ఇకపై ఏటీఎంలో డబ్బులు డ్రా చేసే ముందు మీ బ్యాంకు ఖాతాలో ఆ మేరకు బ్యాలెన్స్‌ ఉందా లేదా అన్నది ముందుగా తెలుసుకోవడం ఎంతో ముఖ్యం. తగినంత బ్యాలెన్స్‌ లేదంటే ట్రాన్సాక్షన్‌ ఫెయిలయిన సందర్భాల్లో ఆయా బ్యాంకుల నిబంధనల మేరకు రూ.20 నుంచి రూ.25తో పాటు పన్నులను పెనాల్టీగా వసూలు చేస్తున్నాయి. సో.. ఇకనైనా జాగ్రత్త వహించండి. 

లోక‌ల్ టు గ్లోబ‌ల్‌.. వార్త ఏదైనా.. అన్నీ ఒకే యాప్‌లో. న‌మ‌స్తే తెలంగాణ ఆండ్రాయిడ్ యాప్ డౌన్‌లోడ్ చేసుకోండి.