నేను ఉద్యోగం చేస్తాను. ఆఫీసులో ఒత్తిడి ఎక్కువే. అయినా కుటుంబ బాధ్యతలకు న్యాయం చేయాలనుకుంటాను. కానీ ఇంటి పనులు సరిగ్గా చేయట్లేదనీ, అత్తింటివాళ్లతో మంచిగా ఉండట్లేదనీ నా భర్త నన్ను మానసికంగా, శారీరకంగా హింసిస్తున్నాడు. ఆ నరకం భరించలేక ఎనిమిది నెలల క్రితం నా బిడ్డను తీసుకొని పుట్టింటికి వచ్చేశాను. వచ్చేటప్పుడు మా అమ్మవాళ్లు పెండ్లి సమయంలో, ఆ తర్వాత పెట్టిన బంగారు నగలు, ఇతర విలువైన సామగ్రిని తీసుకురాలేదు. ఇప్పుడు వాటిని తిరిగి ఇచ్చేయమని అడిగితే, నా భర్త నిరాకరిస్తున్నాడు. అంతేకాదు, మ్యూచువల్ కన్సెంట్ డైవోర్స్ కోసం లాయర్ ద్వారా నా మెయిల్కి నోటీసు పంపించాడు. ఈ పరిస్థితుల్లో మా పుట్టింటివాళ్లు పెట్టిన విలువైన వస్తువులను ఎలా తెచ్చుకోవాలి? నోటీసుపై ఎలా స్పందించాలి?
మీ భర్త పంపిన మ్యూచువల్ కన్సెంట్ డైవోర్స్ నోటీసును మీరు తక్షణం అంగీకరించాల్సిన అవసరం లేదు. ఆ తరహా విడాకుల్లో భార్యాభర్తలిద్దరి ఆమోదమూ ఉండాలి. అలా కాకుండా, ఏ ఒక్కరికి విడాకులు తీసుకోవడం ఇష్టం లేకపోయినా కేసు వీగిపోతుంది. మీ విషయంలో విడాకుల ప్రస్తావన అతనివైపు నుంచే వచ్చింది కాబట్టి, మీరు ఒప్పుకోవాల్సిన అవసరం లేదు. ఒకవేళ మీకు మ్యూచువల్ కన్సెంట్ డైవోర్స్కి ఒప్పుకోవాలనుంటే, ముందుగా మీ భర్తతో మాట్లాడండి. విడాకుల పత్రాలమీద సంతకం పెట్టేముందే, వాళ్ల దగ్గర ఉన్న స్త్రీ ధనాన్ని ఇచ్చేయాలని షరతు విధించండి. స్త్రీ ధనం అంటే, పెండ్లి సమయంలో ఆడపిల్లలకు పుట్టింటివాళ్లు బహుమతిగా ఇచ్చే డబ్బు, బంగారం, ఆభరణాలు, ఇతర విలువైన వస్తువులు. వాటిమీద పరిపూర్ణ అధికారం మీదే. ఈ విషయంలో ఎలాంటి ఒత్తిడికీ లోను కాకండి. ధైర్యంగా నిర్ణయం తీసుకోండి.