న్యూఢిల్లీ, ఫిబ్రవరి 12: బిట్కాయిన్.. క్రిప్టోకరెన్సీ మార్కెట్లో రారాజు. ఎవరి మద్దతు లేకుండానే పరుగులు పెట్టిన ఈ డిజిటల్ కరెన్సీకి ఇప్పుడు గ్లోబల్ ఆర్థిక దిగ్గజాల అండ లభిస్తున్నది. ఇంకేముంది ఆకాశమే హద్దుగా దీని విలువ పరుగులు పెడుతున్నది. ప్రస్తుతం ఒక్క బిట్కాయిన్ విలువ 48,481 డాలర్లు. భారతీయ కరెన్సీలో ఇది రూ.35.27 లక్షలతో సమానం. గురువారం ఒక్కరోజే బిట్కాయిన్ విలువ 8 శాతానికిపైగా ఎగబాకడం గమనార్హం. దీంతోనే మునుపెన్నడూ లేని గరిష్ఠానికి బిట్కాయిన్ విలువ చేరిపోయింది. అయితే ఈ ఆల్టైమ్ హై రికార్డుకు కారణం లేకపోలేదు. బ్యాంక్ ఆఫ్ న్యూయార్క్ మెల్లాన్, మాస్టర్కార్డ్.. సరికొత్త క్రిప్టోకరెన్సీ ప్రాజెక్టులతో బిట్కాయిన్ మరింత ఆకర్షణీయంగా మారిపోయింది.