బుధవారం 28 అక్టోబర్ 2020
Badradri-kothagudem - Sep 29, 2020 , 00:31:02

అరచేతిలో సమాచారం

అరచేతిలో సమాచారం

  • సాగు సమస్యలకు చెక్‌
  • రైతు చెంతకు సాంకేతికత
  • టోల్‌ఫ్రీ నంబర్‌ 18004291939

వ్యవసాయానికి సాంకేతికత తోడైతే అద్భుతాలు ఆవిష్కృతమవుతాయి. సాగులో సందేహాలను నివృత్తి చేసుకొని అన్నదాత సిరులు పండిస్తాడు. ప్రస్తుతం రైతు చేతిలో సెల్‌ఫోన్‌ ఉంటే చాలు అక్కడికక్కడే సాగు సమాచారం అందుతుంది. రూపాయి ఖర్చు లేకుండానే పంట పొలాల్లో సమస్య తీరుతుంది. వ్యవసాయాధికారుల వద్దకు వెళ్లకుండానే నిమిషాల్లోనే పని పూర్తవుతుంది. 

- కొత్తగూడెం 

భద్రాద్రి కొత్తగూడెం జిల్లాలోని 23 మండలాల్లో పత్తి (తెల్ల బంగారం) 2,05,494.8 ఎకరాలు, కందులు 10,893.3 ఎకరాలు, వరి 1,40,285.3 ఎకరాల్లో నియంత్రిత పద్దతిలో రైతులు సాగు చేస్తున్నారు. సుమారు 60 శాతం మంది రైతన్నలు సాగులో సమస్యలు ఎదుర్కొంటున్నారు. కార్యాలయానికి వెళ్తే వ్యవసాయాధికారులు అందుబాటులో ఉంటారో, లేదో పని మీద వేరే గ్రామానికి వెళ్తే... వేచి చూసే అక్కర లేకుండా ప్రభుత్వం చేసింది. సెల్‌ఫోన్‌ ద్వారా నేరుగా సమస్యలకు పరిష్కారాన్ని తెలుసుకునే అవకాశం కల్పించింది. ఇలా సెల్‌ఫోన్‌ వినియోగించి తమ సందేహాలను నివృత్తి చేసుకుంటున్న రైతుల సంఖ్య రోజురోజుకూ పెరుగుతుంది. సిరుల పంట పండించేందుకు వ్యవసాయాధికారుల సలహాలు, సూచనలు ఎంతగానో తోడ్పడుతున్నాయి. 

అధికారులు అందుబాటులో లేకున్నా...

      ప్రస్తుతం వ్యవసాయ అధికారులు కార్యాలయాలకు పరిమితం కాకుండా గ్రామాల్లోకి వెళ్తూ రైతుల సాగు చేస్తున్న పంటల వివరాలను నమోదు చేస్తున్నారు. మధ్యాహ్నం తిరిగి వచ్చి మిగతా శాఖాపరమైన పనుల్లో నిమగ్నమవుతున్నారు. పంటలు సాగు చేసే సమయంలో క్షేత్రస్థాయిలో రైతులకు సమస్యలొస్తే అధికారులు అందుబాటులో లేకున్నా సెల్‌ఫోన్‌ ద్వారా సాగుపై సందేహాలను నివృత్తి చేసుకునే వీలుంది. ఈ విధానంతో జిల్లాలోని రైతులు నేరుగా కేవీకే శాస్త్రవేత్తలు, జిల్లా, మండల వ్యవసాయ అధికారులతో మాట్లాడుతూ సూచనలు, సలహాలు పొందుతున్నారు. 

సంప్రదించడం ఇలా..

     రైతుల సందేహాలను నివృత్తి చేసేందుకు ఉదయం 7 గంటల నుంచి రాత్రి 8 గంటల వరకు సిబ్బంది అందుబాటులో ఉంటారు. కంప్యూటర్‌ మాదిరిగానే సెల్‌ఫోన్‌లో కూడా సమాచారం అందుతుంది. టోల్‌ఫ్రీ నంబర్‌ 18004291939కు ఫోన్‌ చేస్తే ‘కిసాన్‌ కాల్‌ సెంటర్‌' మీకు స్వాగతమంటూ వినిపిస్తుంది. జిల్లా, మండల, గ్రామం, రైతు పేరు పంటల సాగు తదితర అంశాలను అడుగుతారు. సమస్యకు అవసరమైన సూచనలు, సలహాలు 

అందిస్తారు.

తక్షణమే సమాచారం...

     సాగు విధానంలో వచ్చిన సందేహాలను పంట చేలోనే ఉంటూ తెలుసుకుంటున్న, కొత్త పంటల సాగు విధానం గురించి వివరంగా చెబుతున్నారు. విత్తనాలు, ఎరువుల మోతాదు, పంటలపై మందుల పిచికారీ అంశాలపై వివరిస్తుంది. పంటలు తెగుళ్ల బారిన పడిన సమయంలో అధికారుల చుట్టూ తిరిగే పని లేకుండా నేరుగా సెల్‌ఫోన్‌తో తెలుసుకున్న సమాచారం ఎంతో మేలు చేస్తుంది. 

 సాగు విధానంపై సూచనలు

     పంట పొలాలను క్రిమికీటకాలు ఆశించిన సమయంలో దుకాణదారుడు ఇచ్చిన మందును పిచికారీ చేయడం రైతులకు అలవాటుగా మారింది. కిసాన్‌ కాల్‌సెంటర్‌కు దుకాణం నుంచే ఫోన్‌ చేసి మందుల వివరాలు తెలుసుకోవాలి. ఈ సెంటర్‌ నుంచి మనకు సరైన సమచారం వస్తుంది. ఒక్కోసారి దుకాణదారుడు వారి వ్యాపారానికి అనుగుణంగా మందులు అంటగట్టే అవకాశం ఉంటుంది. 

ఆన్‌లైన్‌ ద్వారా.. 

      వ్యవసాయం, ఉద్యానవనం, పశువైద్యం, మత్స్యశాఖలకు సంబంధించి ఏదో ఒక విభాగాన్ని ఎంచుకుంటూ రైతులు సమాధానాలు పొందుతున్నారు. కాస్త కంప్యూటర్‌ పరిజ్ఞానం కలిగిన వారంతా www. tsagrinet.gov.in లోకి వెళ్లి సాగు సమాచారం తెలుసుకుంటున్నారు. మరి కొందరు రైతులు యూట్యూబ్‌ ద్వారా తెలుసుకుంటున్నారు.

సాంకేతిక వాడకం పెరిగింది..


పెరిగిన సాంకేతిక పరిజ్ఞానంతో చాలా మంది రైతులు స్వయంగా ఫోన్‌ చేసి సందేహాలను అడిగి తెలుసుకుంటున్నారు.  ఇచ్చిన సూచనలు, సలహాలు పాటిస్తున్నారు. సాగులో ఇబ్బందులు ఎదుర్కొంటే సంబంధిత వ్యవసాయ విస్తరణ అధికారికి ఫోన్‌ చేసి సమాచారాన్ని అడిగి తెలుసుకోవచ్చు. సందేహాలను నివృత్తి చేసేందుకు మేమెప్పుడూ వెనుకాడం. ఓపికతో సమాధానం చెప్తున్నాం.

-డీఏవో కొర్సా అభిమన్యుడు 


logo