వనపర్తి, మార్చి 23 : సాధించాలన్న కృషి, పట్టుదల ఉంటే సాధ్యం కానిదంటూ ఏమి ఉండదు. నేటి కంప్యూటర్ యుగంలో పోటీ లేకుండా ఉద్యోగం సాధించలేని పరిస్థితి. ఇలాంటి పోటీని తట్టుకొని నిరుద్యోగులు ఉన్నత స్థానాలకు ఎదగాలంటే వేల రూపాయలు ఖర్చు పెట్టి పేరు మోసిన సెంటర్లలో కోచింగ్ తీసుకెళ్లేందుకు నగరాలకు వెళ్లాల్సి వస్తున్నది. ఆర్థిక స్థోమత లేని పేదలు మాత్రం వీటికి దూరంగా ఉంటున్నారు. అందుకే డిగ్రీలు చదివిన నిరుపేద నిరుద్యోగులను చేరదీస్తూ సన్మార్గం వైపు తీసుకెళ్లేలా.. వివిధ పోటీ పరీక్షలకు సన్నద్ధం చేసేందుకుగానూ ఉచిత కోచింగ్ సెంటర్ ఏర్పాటు చేసి అండగా నిలుస్తున్నారు.. దేవరకద్ర ఎమ్మెల్యే ఆల వెంకటేశ్వర్రెడ్డి. తన తండ్రి రఘుపతిరెడ్డి పేరు మీద ఏర్పాటు చేసిన ట్రస్ట్ ఆధ్వర్యంలో నిరుద్యోగులకు ఉచిత శిక్షణకు శ్రీకారం చుట్టారు. వ్యవసాయ శాఖ మంత్రి నిరంజన్రెడ్డితో కలిసి ఎమ్మెల్యే ఆల శిక్షణను ప్రారంభించి దాతృత్వాన్ని చాటుకుంటున్నారు. పేద నిరుద్యోగులకు తాను ఉన్నానంటూ ఆదర్శంగా నిలుస్తున్నారు. సూదూర ప్రాంతా ల నుంచి వచ్చే వారు సగం ఆకలితో ఉండకూడదనే ఉద్దేశంతో మ ధ్యాహ్న భోజన సౌకర్యాన్ని కూడా కొనసాగిస్తున్నారు. ఈ కోచింగ్కు స్పందన లభిస్తున్నది.
ఉద్యోగం సాధించడమే లక్ష్యంగా..
ఈనెల 10వ తేదీన కొత్తకోట పట్టణంలోని రాఘవేంద్ర స్వామి కల్యాణ మండపంలో మంత్రి నిరంజన్రెడ్డితో కలిసి ఉచిత కోచింగ్ను ఎమ్మెల్యే ఆల ప్రారంభించారు. గతంలోనే కొత్తకోట, దేవరకద్రలో 750 మందికి పోలీస్, ఆర్మీ, వివిధ పోటీ పరీక్షలకుగానూ ఉచిత కోచింగ్ అందించగా.. 187 మంది ఉద్యోగాలను సాధించారు. వారి బతుకుల్లో వెలుగులను నింపారు. మరో సారి ఉచిత కోచింగ్ను ప్రారంభించారు. త్వరలో వివిధ శాఖల్లో ఉన్న 50 వేల ఉద్యోగ ఖాళీలను భర్తీ చేసేందుకు ప్రభుత్వం నోటిఫికేషన్ జారీ చేయనున్న నేపథ్యంలో కొత్తకోటతోపాటు వివిధ మండలాలకు చెందిన 600 మంది నిరుద్యోగులకు ఉచిత భోజనం, రూ.12 వేల విలువైన స్టడీ మెటీరియల్, ట్రాన్స్పోర్ట్తో పాటు శిక్షణ అందిస్తూ వారి ఉజ్వల భవిష్యత్తుకు బాటలు వేస్తున్నారు. వీరికి 60 రోజుల పాటు ప్రతి రోజు ఉదయం 10 నుంచి సాయంత్రం 5 గంటల వరకు హైదరాబాద్లోని పీజేఆర్ సంస్థ ఆధ్వర్యంలో నిష్ణాతులైన ఉపన్యాసకుల ద్వారా బోధన అందిస్తున్నారు. విద్యార్థుల అనుమానాలను నివృత్తి చేయడంతోపాటు ప్రతి రోజూ పరీక్ష, వారానికి ఒకసారి గ్రాండ్ టెస్ట్లను నిర్వహిస్తూ వారిలోని ప్రతిభను వెలికితీస్తున్నారు. కోచింగ్కు వచ్చే మహిళల ఇబ్బందులను గుర్తించిన ఎమ్మెల్యే ఆల స్థానిక టీఆర్ఎస్ నాయకులతో కలిసి రాత్రివేళల్లో ఆటోల్లో విద్యార్థులను ఇండ్లకు సురక్షితంగా చేర్చుతున్నారు.
ఉద్యోగం సాధించి ఎమ్మెల్యే రుణం తీర్చుకుంటా ..
మా నాన్న మేస్త్రీ పని చేస్తుండగా ప్రమాదవశాత్తు గాయపడి ఆపరేషన్ జరిగింది. అలాంటి సమయంలో ఎమ్మెల్యే ఆల వెంకటేశ్వర్రెడ్డి రూ. లక్ష ఎల్వోసీ అందించి మా కుటుంబాన్ని ఆదుకున్నాడు. ఉద్యోగం సాధించాలని తపన ఉన్న నాకు ఆర్థిక పరిస్థితులు సహకరించక ఇబ్బందులు పడుతుంటే ఉచిత కోచింగ్ వరంలా మారింది. ఎలాగైనా ఉద్యోగం సాధించి ఎమ్మెల్యే ఆల రుణం తీర్చుకుంటా..
నిరుపేదలు ఉద్యోగాల్లో స్థిరపడాలి
నియోజకవర్గంలోని పేద కుటుంబాల్లోని యువతీ యువకులు ప్రయోజకులు కావాలనే ఖర్చుకు వెనుకాడటం లేదు. వివిధ పోటీ ప రీక్షల కోసం ఉచిత శిక్షణకు శ్రీకారం చుట్టాం. రాబోయే రోజుల్లో ఇక్కడి నిరుద్యోగులు ప్రభుత్వ ఉద్యోగాల్లో స్థిరపడాలన్నదే నా సంకల్పం. పీజేఆర్ వంటి ప్రత్యేక కోచింగ్ యాజమాన్యాలతో మాట్లాడి నిష్ణాతులైన వారిచే శిక్షణ ఇప్పిస్తున్నాం. గతంలో దేవరకద్రలో 70 రోజులపాటు నిర్వహించిన శిక్షణలో 187 మంది ఉద్యోగాలు సాధించారు. 100 శాతం మంది ఉద్యోగాలను సాధించేలా కోచింగ్ ఇప్పిస్తున్నా..