కోల్కతా: చాలా మందికి ఉదయాన్నే ఒక కప్పు టీ తాగకుండా రోజు మొదలవదు. అంతేకాదు అలసిపోయి తలనొప్పిగా ఉన్నా, పని ఒత్తిడి ఎక్కువైనా కప్పు టీ తాగితే క్షణాల్లో రిలాక్స్ అనిపిస్తుంది. అందుకే చాలామంది రోజు నాలుగైదు సార్లకు మించే టీ తాగుతుంటారు. టీ ఖరీదు కూడా పెద్దగా ఉండకపోవడంవల్ల అది పెద్ద సమస్య కూడా కాదు. కానీ, పశ్చిమబెంగాల్లో రోడ్డు పక్కన ఉండే ఓ టీ షాప్లో టీ ధర తెలిస్తే మాత్రం షాకవుతారు. అక్కడి టీ ధర ఏకంగా రూ.1000 ఉంటుందట. కోల్కతాకు చెందిన పార్థ ప్రతీమ్ గంగూలీ అనే వ్యక్తి ఆ టీ స్టాల్ను నిర్వహిస్తున్నాడు.
కోల్కతాలోని ముకుంద్పూర్లో ఉన్న గంగూలీ టీ స్టాల్లో వందకు పైగా వెరైటీ టీలు లభిస్తాయి. వివిధ రకాల సుగంధ ద్రవ్యాలతో తయారు చేసే ఆ టీకి అక్కడ ఎంతో క్రేజ్ ఉంది. అందుకే అతని టీ స్టాల్ అక్కడ చాలా ఫేమస్ అయ్యింది. కేవలం బెంగాల్ ప్రజలు మాత్రమే కాకుండా పక్క రాష్ట్రాల నుంచి కూడా చాలామంది అక్కడికి వెళ్లి టీ తాగుతారట. గంగూలీ దగ్గర రూ.12 నుంచి మొదలు వెయ్యి రూపాలయ వరకు అన్ని రకాల టీలు లభిస్తాయి. వెయ్యి రూపాయలకు అమ్మే ఆ టీని జపనీస్ వైట్ లీఫ్ టీగా పిలుస్తారట.
అయితే, ఆ ప్రీమియం టీకి వెయ్యి రూపాయల ధర పెద్ద ఎక్కువేమీ కాదంటున్నాడు గంగూలీ. ఎందుకంటే ఆ టీ తయారీకి వాడే పదార్థాలన్నీ చాలా ఖరీదైనవట. ఆరోగ్యానికి ఎంతో మేలు చేసేవట. అందుకే ఆ టీ స్టాల్ మీదుగా వెళ్లే ప్రతి 1000 మందిలో 100 మంది ఖచ్చితంగా అక్కడ ఆగి టీ తాగుతారట.
ఇక, ఆ టీ స్టాల్ గంగూలీని చుట్టుపక్కల ప్రజలంతా ముద్దుగా పార్థ బాబూ అని పిలుచుకుంటారట. అక్కడి స్థానికులు కొన్ని వెరైటీ టీలకు ముందుగానే అడ్వాన్స్ చెల్లిస్తుంటారట. గంగూలీ కేవలం టీని అమ్మడం మాత్రమే కాదు, టీ పౌడర్ని కూడా విక్రయిస్తాడు. అంతేకాదు దేశవ్యాప్తంగా చాలా మంది టీ వ్యాపారులు తన వద్ద ముడీ టీని తీసుకెళ్తారని గంగూలీ చెబుతున్నాడు.