రాష్ర్టాల వాటా పెంచాలి


Wed,February 20, 2019 02:02 AM

CM KCR Says Telangana model in development

-పన్నుల్లో వాటా 42% నుంచి 50 శాతానికి పెంచేలా సిఫారసు చేయండి
-అభివృద్ధిలో తెలంగాణ మోడల్
-సంక్షేమ పథకాల అమలు రాష్ర్టాలకే
-15వ ఆర్థిక సంఘంతో భేటీలోముఖ్యమంత్రి కే చంద్రశేఖర్‌రావు
-ఎత్తిపోతల పథకాల నిర్వహణకు రూ.40,169 కోట్లు
-మిషన్ భగీరథ నిర్వహణకు రూ.12,722 కోట్లు గ్రాంట్‌గా ఇవ్వాలని విజ్ఞప్తి

హైదరాబాద్, నమస్తే తెలంగాణ: రాష్ర్టాలకు కేంద్రం బదలాయించే పన్నుల వాటాను 42% నుంచి 50 శాతానికి పెంచాలని ముఖ్యమంత్రి కల్వకుంట్ల చంద్రశేఖర్‌రావు 15వ ఆర్థిక సంఘానికి విజ్ఞప్తిచేశారు. ఈ మేరకు కేంద్రానికి సిఫారసు చేయాలని విన్నవించారు. ఇందుకోసం రాష్ట్ర జాబితాలోని అంశాలకు కేటాయింపులను తగ్గించుకుంటే సరిపోతుందని సూచించారు. గతంలో గుజరాత్, కేరళ రాష్ర్టాలు అభివృద్ధి నమూనాలుగా ఉండేవని, ప్రస్తుతం దేశంలో తెలంగాణ రాష్ట్ర అభివృద్ధి నమూనా ప్రాధాన్యం సంతరించుకున్నదని ముఖ్యమంత్రి తెలిపారు. 15వ ఆర్థికసంఘం సమయంలో రాష్ట్రంలోని ఎత్తిపోతల పథకాల నిర్వహణకు రూ.40,169 కోట్లు అవసరమవుతాయని, ఈ మొత్తాన్ని గ్రాంట్ రూపంలో ఇవ్వడానికి కేంద్రానికి సిఫారసు చేయాలని కోరారు. రాష్ట్రంలో ఇంటింటికీ స్వచ్ఛమైన తాగునీటిని నల్లాలతో ఇచ్చేందుకు చేపట్టిన మిషన్ భగీరథ పనులు కొద్దినెలల్లో పూర్తికానున్నాయన్న సీఎం.. 2020-25 కాలంలో ఈ పథకం నిర్వహణకు రూ.12,722 కోట్లను గ్రాంట్‌గా ఇవ్వాలని విజ్ఞప్తిచేశారు. మంగళవారం హైదరాబాద్‌లోని జూబ్లీహాలులో 15వ ఆర్థిక సంఘం చైర్మన్ ఎన్‌కే సింగ్, సభ్యులతో జరిగిన సమావేశంలో సీఎం కేసీఆర్ రాష్ట్ర ప్రాథమ్యాలు, ఆర్థిక అవసరాలు, ప్రస్తుత పరిస్థితులు, కేంద్ర, రాష్ట్ర ప్రభుత్వాల మధ్య ఆర్థిక కేటాయింపులు, పలు పథకాల అమలులో అనుసరించాల్సిన విధానాలపై సుదీర్ఘంగా వివరించారు. ఎన్‌కేసింగ్ నేతృత్వంలోని 15వ ఆర్థికసంఘం తీసుకునే నిర్ణయాలు రాష్ర్టాలను ఆర్థికంగా బలపర్చాలని, ప్రపంచంలోనే శక్తిమంతమైన భారత్ నిర్మాణానికి దోహదపడాలని ఆకాంక్షించారు. సీఎం ప్రసంగంలోని ముఖ్యాంశాలు.. ఆయన మాటల్లోనే..

బంగారు తెలంగాణే లక్ష్యంగా..

నా అభిప్రాయాలను ఆర్థికసంఘానికి నివేదించే ముందు, తెలంగాణ ఆవిర్భావం నాటికి రాష్ట్రంలో పరిస్థితులను సంక్షిప్తంగా మీ ముం దుంచే ప్రయత్నం చేస్తాను. ఉమ్మడి ఆంధ్రప్రదేశ్‌లో తెలంగాణను నిరక్ష్యంచేశారు. తీవ్ర కరంటు కోతలు, పెద్దసంఖ్యలో రైతుల ఆత్మహత్యలు..జాతీయసగటు కంటే తక్కువగా ఆర్థికప్రగతి ఉండేది. తెలంగాణ ఏర్పడేనాటికి ఉన్న పరిస్థితులు, సమస్యలను సవాల్‌గా తీసుకొని, గతంలో లేని కార్యక్రమాలను చేపట్టి, అణిచివేయబడ్డ ప్రజల ఆకాంక్షలు నెరవేర్చడ మే లక్ష్యంగా నిర్దేశించుకున్నాం. బంగారు తెలంగాణ కల సాకారం దిశగా ఒక్కొక్క వ్యవస్థను బాగుచేసుకుంటూ ముందుకు కదిలాం.

రాష్ర్టాలను సంప్రదించకుండానే కేంద్ర పథకాలు

2014 జూన్‌లో తెలంగాణ ఆవిర్భావం తర్వా త మేం చేపట్టిన కార్యక్రమాలు, దేశంలోనే తొలిసారిగా మేం అమలుచేసిన పథకాల గురించి మా అధికారులు మీకు సవివరమైన నివేదిక సమర్పించారు. కొన్ని కార్యక్రమాలపై మా అధికారులు ప్రజెంటేషన్లు ఇచ్చారు. నేను ఆర్థికసమాఖ్యతోపాటు ఆర్థికంగా రాష్ర్టాలను ఏ విధంగా బలోపేతంచేయాలన్న ముఖ్యమైన అంశాలకే పరిమితమవుతాను. దేశంలోని అన్ని రాష్ర్టాల సమస్యలకు పరిష్కారం చూపే లా, దేశాన్ని ఒక్కతాటిపై ఉంచేలా భారత రాజ్యాంగాన్ని రూపొందించారు. ఆర్థికంగా కేంద్ర,రాష్ర్టాల మధ్య అధికారాలను స్పష్టంగా పేర్కొన్నారు. రాష్ర్టాలను ముందస్తుగా సంప్రదించకుండానే కేంద్రం రాష్ర్టాల జాబితాలోని అంశాలను ఉమ్మడిజాబితాలో చేరుస్తూ ఎన్నో పథకాలను రూపొందిస్తున్నది. 14వ ఆర్థికసంఘం లెక్కల ప్రకారం.. 2005-11 మధ్య రాష్ర్టాల అంశాలపై కేంద్ర వ్యయాన్ని 14% నుంచి 20 శాతానికి, ఉమ్మడి జాబితాలోని రాష్ట్రాల అంశాలకు కేంద్ర వ్యయం 13% నుంచి 17శాతానికి పెంచారు. కేంద్రం వసూలుచేస్తున్న లెవీ, సెస్‌లు, శాశ్వత ప్రాతిపదికన వసూలుచేస్తున్న సర్చార్జీల డివిజనల్‌పూల్ తగ్గింపు రాష్ర్టాలపై ప్రభావం చూపుతున్నది.

నీతిఆయోగ్‌లో చెప్పిన అంశాలు పట్టించుకోలేదు

నీతిఆయోగ్ ఏర్పాటుతో రాష్ర్టాలన్నింటికి సమప్రాధాన్యం ఉంటుందని, దేశప్రగతిలో రాష్ర్టాలు భాగస్వాములేననే ఆర్థికసమాఖ్య స్ఫూర్తి పరిఢవిల్లుతుందన్న ఆశలు కలిగాయి. ఆశలన్నీ అలానే మిగిలాయి. నీతిఆయోగ్ ఏర్పాటు తర్వాత ప్రధానమంత్రి, అన్ని రా ష్ర్టాల ముఖ్యమంత్రులకు రాసిన లేఖల్లోనూ.. రాష్ర్టాలు తమ అవసరాలకు అనుగుణంగా ప్రాధాన్యాలను, పథకాలను నిర్ణయించుకోవచ్చునని, రాష్ర్టాలు ఆర్థికంగా బలపడితే దేశం ఆర్థికంగా బలపడుతుందని, రాష్ర్టాల అభివృద్ధిపైనే దేశప్రగతి ఆధారపడి ఉందని పేర్కొన్నారు. అందుకు అనుగుణంగా ఇప్పటివరకు ఏ ఒక్క నిర్ణయం తీసుకోలేదు. వీటన్నింటిని అమలుచేసే దిశగా 15వ ఆర్థికసంఘం కీలక భూమిక పోషిస్తుందని భావిస్తున్నాను. భారత ఆర్థికసమాఖ్య వ్యవస్థలో మార్పుతెచ్చే దిశగా ఆర్థికసంఘం మార్గం చూపుతుందన్న విశ్వాసం ఉన్నది. వెనుకబడిన రాష్ర్టాలకు కేంద్రం చే యూతనివ్వాలన్న నిర్ణయానికి మేం వ్యతిరేకం కానప్పటికీ, అభివృద్ధి చెందుతున్న రాష్ర్టాలకు ఇది ప్రతిబంధకం కావొద్దన్నదే మా అభిప్రా యం. అందుకే వెనుకబడిన రాష్ర్టాలకు ఆర్థికం గా సాయంచేసేందుకు ఆర్థికసంఘం కాకుండా ప్రత్యేకమైన వ్యవస్థ ఉండాలన్నది మా భావన. అందుకే అభివృద్ధిలో దూసుకెళుతున్న రాష్ర్టాలపై భారంలేకుండా వారి కేటాయింపుల్లో ఆర్థికసంఘం తగిన సమతుల్యత పాటించాలని 15వ ఆర్థిక సంఘాన్ని కోరుతున్నాం. న్యూ ఇండియా-2022 అజెండాలో మేం చెప్పిన అంశాలను 15వ ఆర్థికసంఘం పరిగణనలోకి తీసుకుంటుందని భావిస్తున్నాం.

జీఎస్డీపీలో 3 శాతాన్ని 4 శాతం చేయాలి

14వ ఆర్థికసంఘం సిఫారసు మేరకు బీఆర్జీఎఫ్, మోడల్ స్కూల్స్‌లో రాష్ట్రాల వాటా పెంచారు. ఇతర కేంద్ర ప్రాయోజిత పథకాల్లో రాష్ట్రాల వాటా పెంచారు. ఈ నిర్ణయంతో తెలంగాణ ఇబ్బందులు పడుతున్నది. రాష్ట్ర జీఎస్డీపీలో మూడు శాతం మాత్రమే అప్పులు తెచ్చుకునే వెసులుబాటు ఉన్నది. 15వ ఆర్థికసంఘం దీనిని నాలుగు శాతం చేయడానికి కేంద్రానికి సిఫారసు చేయాల్సిందిగా కోరుతున్నాం. దీనిద్వారా రాష్ట్రంలో చేపట్టిన ప్రాజెక్టుల పనులు వేగంగా కొనసాగుతాయి.

రైతుబంధు తరహా పథకాలు ఇతర రాష్ర్టాల్లో

ఒకే తరహా పథకాల్లో కేంద్రం కంటే మెరుగ్గా రాష్ట్ర ప్రభుత్వాలు అమలుచేస్తున్నట్టయితే వాటిని కేంద్రం నుంచి తొలిగించాలి. రాష్ట్ర ప్రభుత్వాలు అమలుచేస్తున్న ముఖ్య కార్యక్రమాల్లోనూ ప్రోత్సాహకాలను పెంచడంపైనా దృష్టి పెట్టాలి. గతంలో వివిధ రాష్ట్రాలు ప్రవేశపెట్టిన పథకాలను ఆ తరువాతి కాలంలో కేంద్ర ప్రభుత్వం ప్రవేశపెడుతున్నది. తమిళనాడు మధ్యాహ్న భోజనపథకాన్ని ప్రవేశపెట్టింది. ఈ పథకాన్ని కేంద్రం అనుసరించింది. మహారాష్ట్ర ఎంప్లాయిమెంట్ గ్యారెంటీ స్కీమ్ ప్రవేశపెట్టినప్పుడు విమర్శించారు. తర్వాత అదే పథకాన్ని కేంద్రం అమలుచేసింది. తాజాగా తెలంగాణ ప్రభుత్వం రైతుబంధు పథకాన్ని ప్రవేశపెట్టింది. ఈ పథకాన్ని ఇతర రాష్ట్రాలు అమలుచేస్తున్నాయి. కేంద్రం కూడా ఈ తరహా పథకాన్ని ప్రవేశపెట్టింది కానీ లక్ష్యాన్ని నీరుగార్చేలా ఉన్నది. సంక్షేమ పథకాల అమలు బాధ్యతను రాష్ట్రాలకు వదలాలి.

స్థానిక సంస్థలకు గ్రాంట్లు పెంచాలి

తెలంగాణ ప్రభుత్వం స్థానికసంస్థలు, మిషన్ భగీరథ, ఎత్తిపోతల పథకాల నిర్వహణపై దృష్టిపెట్టింది. జవాబుదారీతనం పెంచుతు న్నాం. కొత్త పంచాయతీరాజ్ చట్టాన్ని తీసుకొచ్చాం. గతంలో 8,368 పంచాయతీలుగా ఉండగా 12,751కు పెంచాం. మున్సిపాలిటీలను 74 నుంచి 142కు పెంచాం. స్థానికసంస్థలకు గ్రాంట్లు పెంచాల్సిందిగా కోరుతున్నాం. రాష్ట్ర ప్రభుత్వం 1.24 కోట్ల ఎకరాలకు సాగునీరు ఇవ్వాలని నిర్ణయించింది. ఉమ్మడి రాష్ట్రంలో తెలంగాణ ప్రాజెక్టులను నిర్లక్ష్యంచేశారు. 13 జిల్లాల్లోని 18 లక్షల ఎకరాలకు సాగునీరు అందించడానికి కాళేశ్వరం ప్రాజెక్టు ను రూ.80 వేల కోట్లతో నిర్మిస్తున్నాం. తెలంగాణ రాష్ట్రం గోదావరి, కృష్ణా నదులకు ఎగువన ఉన్నది. దీంతో ఎత్తిపోతల పథకాలపై ఆధారపడాల్సి వస్తున్నది. 15వ ఆర్థికసంఘం సమయంలో ఎత్తిపోతల పథకాల నిర్వహణకు రూ.40,169 కోట్లు అవసరమవుతాయి. ఈ మొత్తాన్ని గ్రాంట్ రూపంలో ఇవ్వడానికి కేంద్రానికి సిఫారసు చేయాల్సిందిగా కోరుతున్నాం.

ప్రస్తుతం తెలంగాణ అభివృద్ధి మోడల్

దేశంలో సహజవనరులున్నా నిరుపయోగంగానే ఉన్నాయి. ప్రజల కనీసావసరాలు తీర్చలేకపోతున్నాం. దేశంలో 50% ప్రజలు ఆధారపడిన వ్యవసాయరంగం పరిస్థితి ఆందోళనకరంగా ఉన్నది. ప్రజల జీవితాలను బాగుచేసేలా రాష్ర్టాల అవసరాలు ఏమిటి అన్నదానిపై కేంద్ర, రాష్ట్ర ప్రభుత్వాలు కలిసి ఆలోచించాల్సిన సమయం వచ్చింది. ఆర్థిక అంశాల్లో కేంద్రం కంటే రాష్ర్టాల విధానాలే ఎంతో మెరుగ్గా ఉన్నాయి. గతంలో గుజరాత్, కేరళ రాష్ర్టాలు అభివృద్ధి నమూనాలుగా ఉండేవి. కానీ ప్రస్తుతం తెలంగాణ రాష్ట్ర అభివృద్ధి నమూనా ప్రాధాన్యం సంతరించుకున్నది.

భగీరథకు 12,722 కోట్లు గ్రాంట్ ఇవ్వండి

రాష్ట్రంలో ప్రతి ఇంటికి నల్లా నీటిని అందించడానికి మిషన్ భగీరథ కార్యక్రమాన్ని చేపట్టాం. ఈ పథకం పనులు రాబోయే కొద్దినెలల్లో పూర్తవుతాయి. ఇంటింటికీ సురక్షిత నీటిని అందించడంద్వారా పుట్టుకతో వచ్చే వ్యాధులను నివారించవచ్చు. రాబోయే 2020-25 వరకు ఈ పథకం నిర్వహణకు గ్రామీణ ప్రాంతాల్లో రూ.10,142 కోట్లు, పట్టణప్రాంతాల్లో రూ.2,580 కోట్లు అవసరమవుతాయని అంచనా వేశాం. ఈ మొత్తం రూ.12,722 కోట్లు గ్రాంట్‌గా ఇవ్వాలని కోరుతున్నాను. ఇలాంటి పథకం దేశంలో ఎక్కడా లేదు.

1073
Follow us on : Facebook | Twitter

More News

VIRAL NEWS

Featured Articles

Health Articles