ఐటీ ఉద్యోగం కోల్పోయినవారిలో సగం మందికి కొత్త అవకాశాలు

Mon,June 19, 2017 02:46 AM

సీఐఈఎల్ హెచ్‌ఆర్ సర్వే
events
ముంబై, జూన్ 18: వచ్చే రెండేండ్లలో దేశంలోని ఐటీ రంగంలో 2 లక్షల మంది ఉద్యోగం కోల్పోవచ్చని అంచనా. అయితే, సగం మంది కొత్త టెక్నాలజీల్లో శిక్షణ పొంది అవకాశాలను అందిపుచ్చుకునే అవకాశం ఉందని సీఐఈఎల్ హెచ్ సర్వీసెస్ సర్వే నివేదిక వెల్లడించింది. 50 ఐటీ కంపెనీల్లోని మిడ్, సీనియర్ ఉద్యోగుల నుంచి సేకరించిన వివరాల ఆధారంగా సంస్థ ఈ రిపోర్టును రూపొందించింది. ఐటీ ఇన్‌ఫ్రాస్ట్రక్చర్ సపోర్ట్, టెస్టింగ్, సాఫ్ట్‌వేర్ డెవలప్‌మెంట్ విభాగాల్లో ఉద్యోగం కోల్పోయే ముప్పు పెరిగిందని సీఐఈఎల్ హెచ్‌ఆర్ సర్వీసెస్ సీఈవో ఆదిత్య నారాయణ్ మిశ్రా అన్నారు. అయితే, క్లౌడ్ కంప్యూటింగ్, ఆర్టిఫీషియల్ ఇంటెలిజెన్స్‌తోపాటు ఇతర టెక్నాలజీల్లో అవకాశాలు పెరుగుతున్నాయని ఆయన పేర్కొన్నారు.

ఉద్యోగం కోల్పోయేవారిలో సగం మందికి పైగా కొత్త టెక్నాలజీల ద్వారా పుట్టుకొచ్చే అవకాశాలను అందిపుచ్చుకోగలరని ఆయన అన్నారు. మిగతా యాభై శాతం మందికి మాత్రం మళ్లీ ఐటీ ఉద్యోగం దొరకకపోవచ్చని, ఇతర రంగాల్లో అవకాశాలు చూసుకోవాల్సి రావచ్చన్నారు. ఐటీ రంగంలో బోట్స్ వంటి ఆటోమేటెడ్ టూల్స్ మానవ వనరుల అవసరాన్ని తగ్గిస్తున్నాయి. దాంతో చాలా విభాగాల్లో పనిచేస్తున్నవారి ఉద్యోగానికి ముప్పు ఏర్పడింది. సీఐఈఎల్ సర్వేలో పాల్గొన్న వారిలో కేవలం 33 శాతం మంది మాత్రమే ఆటోమేషన్, సామాజిక రాజకీయ పరిస్థితుల కారణంగా ఐటీ రంగంలో ఉద్యోగాలు కోల్పోతున్నారని అభిప్రాయపడ్డారట. ఐటీ రంగంలో ఊహించినదానికంటే ముందుగానే భారీ మార్పులు రావడమే ఉద్యోగాలకు ముప్పు తెచ్చిందని 44 శాతం మంది పేర్కొన్నారు.

344

More News

మరిన్ని వార్తలు...